दाङ, २३ जेठ ।
हाम्रो पहुँच सेकेन्डरी स्कुलका विद्यार्थीको निःशुल्क रक्त समूह अर्थात् ब्लडग्रुप परिक्षण गरिएको छ । ब्लड बैंक तुलसीपुरमा ल्याब ईन्चार्जको रूपमा कार्यरत रहेका नरेश चौधरीले हाम्रो पहुँच माध्यमिक विद्यालयमा कक्षा ३ देखि १० कक्षासम्म अध्ययनरत करिब ६ सय विद्यार्थीको निःशुल्क रक्त समूह परिक्षण गरेका हुन् ।
आफू सो विद्यालयको पूर्व विद्यार्थी रहेको भन्दै सो विद्यालयमा अध्ययनरत अन्य विद्यार्थीलाई थोरै भएपनि राहत मिलोस् भनेर आफूले निःशुल्क रक्तसमूह परिक्षण गरिदिएको उनको भनाइ छ । उनले यसअघि पनि मावि कालाखोला लगायतका विद्यालयमा विद्यार्थीको पनि निःशुल्क रक्तसमूह परिक्षण गरिदिएको पनि उनले बताए ।
रक्तसमूह अर्थात् ब्लडग्रुप परिक्षण गर्दा समूहगत रूपमा प्रतिव्यक्ति एक सय लाग्ने गरेपनि पूर्णरूपमा निःशुल्क गरेको उनको भनाइ छ । विद्यार्थीले भने निःशुल्क सेवा पाउँदा खुसी भएका छन् ।
