दाङ, २९ भदौ । दाङसहित तीन जिल्लामा आउँदो आइतबार सार्वजनिक बिदा हुने भएको छ । लुम्बिनी प्रदेश सरकारले थारू समुदायको बड्का अट्वारीको अवसरमा दाङ, बाँके र बर्दियामा सार्वजनिक बिदा दिने भएको हो । भदौ ३१ गते पर्ने अट्वारीको दिन सम्बन्धित समुदायलाई बिदा दिने निर्णय गरेको हो । लुम्बिनी प्रदेशको गृह मन्त्रालयले एक विज्ञप्ति जारी गरि यस्तो जानकारी दिएको हो ।
थारू समुदायले अट्वारीलाई विशेष पर्वका रूपमा मनाउने गरेका छन् । थारू जातिको बाहुल्यता भएका यी तीन जिल्लामा प्रदेश सरकारले बिदा दिने भएको हो । गत चैत १७ गतेको निर्णय अनुसार बिदा दिइएको अधिकृत माधव शर्माले जारी गरेको सूचनामा उल्लेख गरिएको छ ।
यसैबीच घोराही उपमहानगरपालिकाले भदौ ३१ गते आइतबार सार्वजनिक बिदा दिएको छ । थारू समुदायको अट्वारी पर्वको अवसरमा एक दिन उपमहानगर र उपमहानगरअन्तर्गत रहेका सबै कार्यालय तथा सामुदायिक तथा संस्थागत विद्यालयमा समेत सार्वजनिक बिदा दिइएको उपमहानगरले जनाएको छ । नगर कार्यपालिकाको निर्णय अनुसार बिदा दिने निर्णय भएको उमहानगरका प्रमुख प्रशासकीय अधिकृत भोजराज घिमिरेले जानकारी दिए ।
